5 Gjennomføring

5.1 Vurderinga til skoleeigar

Gjennomføring for 2019-kullet i Møre og Romsdal, etter fem/seks år i vidaregåande opplæring, er på 83,2 prosent. Gjennomføringa har gått opp med 0,4 prosentpoeng samanlikna med 2018-kullet. Målet i Møre og Romsdal er at over 85 prosent skal gjennomføre etter fem/seks år i vidaregåande opplæring.

På landsbasis har gjennomføringa gått ned med 0,3 prosentpoeng, frå 82,1 prosent for 2018-kullet til 81,8 prosent for 2019-kullet. Møre og Romsdal ligg 1,4 prosentpoeng over landsgjennomsnittet, og berre Oslo, Akershus og Rogaland kan vise til betre resultat.

Gjennomføring i vidaregåande opplæring blir målt fem/seks år etter elevane starta på Vg1. Studieførebuande utdanningsprogram blir målt etter fem år, og yrkesfaglege utdanningsprogram blir målt etter seks år.

Både innan studieførebuande utdanningsprogram og yrkesfaglege utdanningsprogram har gjennomføringa gått opp. Innan yrkesfaglege utdanningsprogram er vi fylket med høgast gjennomføring. Innan studieførebuande utdanningsprogram er det berre Akershus, Vestfold og Rogaland som kan vise til høgare gjennomføring.

Det er store forskjellar i gjennomføring mellom dei ulike utdanningsprogramma. Både i Møre og Romsdal og på landsbasis er gjennomføringa høgast på idrettsfag.

Ved årets publisering har SSB gjort ein full gjennomgang av korleis gjennomføringsstatistikken blir produsert. For å kunne samanlikne resultat over tid har SSB publisert nye tidsseriar med gjennomføringstabellar for kulla som starta i vidaregåande opplæring i 2014 til og med 2019.

5.2 Gjennomføring i løpet av fem/seks år

83,2 prosent av dei som begynte på Vg1 i Møre og Romsdal i 2019 gjennomførte med studie- eller yrkeskompetanse i løpet av fem/seks år. Samanlikna med 2018-kullet (82,8 prosent) har gjennomføringa gått opp med 0,4 prosentpoeng.

Møre og Romsdal ligg 1,4 prosentpoeng over landsgjennomsnittet som er på 81,8 prosent. Samanlikna med dei andre fylka er det berre Oslo, Akershus og Rogaland som kan vise til høgare gjennomføring for 2019-kullet.

Målsettinga i Møre og Romsdal er at over 85 prosent av elevar og lærlingar skal gjennomføre vidaregåande opplæring etter fem/seks år. Regjeringa har som mål at ni av ti skal fullføre og bestå vidaregåande opplæring i 2030 (jf. Meld. St. 21 - Fullføringsreformen).

I Møre og Romsdal har gjennomføringa auka med 2,6 prosentpoeng frå 2014-kullet til 2019-kullet. På landsbasis har gjennomføringa auka med 2,2 prosentpoeng for same periode.

På landsbasis viser fullføringsstatus på normert tid ei auke på 0,2 prosentpoeng, frå 2018-kullet til 2019-kullet. I Møre og Romsdal viser fullføringsstatus på normert tid ei auke på 1,2 prosentpoeng frå 2018-kullet til 2019-kullet.

Det er fleire jenter enn gutar som gjennomfører vidaregåande opplæring. Vi ser ei positiv utvikling for gutar, medan jentene viser ei svak negativ utvikling. Dette samsvarar med trenden på landsbasis.

Det er ein tydeleg samanheng mellom grunnskolepoenga til elevane som startar på vidaregåande skole og gjennomføringa av vidaregåande opplæring. Andelen som fullfører er størst blant dei med høge grunnskolepoeng. Vi ser at det er eit markant skilje på 30 poeng. Elevane som har over 30 poeng gjennomfører i over dobbelt så stor grad som elevane som har under 30 poeng.

5.3 Gjennomføring i løpet av fem/seks år, inkludert planlagt grunnkompetanse

Ein kan også velje å inkludere elevar i vidaregåande opplæring som gjennomfører med planlagt grunnkompetanse. Dette er elevar som innan fem/seks år ikkje har fullført med studie- eller yrkeskompetanse, men som har gjennomført med grunnkompetanse. Medrekna elevar som gjennomfører med grunnkompetanse er tala slik:

5.4 Gjennomføring fordelt på utdanningsprogram

Det er store forskjellar i gjennomføringstala mellom studieførebuande og yrkesfaglege utdanningsprogram. Både i Møre og Romsdal og på landsbasis er gjennomføringa høgast for studieførebuande utdanningsprogram.

Gjennomføringa på studieførebuande utdanningsprogram for 2019-kullet i Møre og Romsdal er på 92,1 prosent. Det nasjonale snittet er på 90,8 prosent. Akershus, Vestfold, og Rogaland har høgare gjennomføring enn Møre og Romsdal.

Samanlikna med 2018-kullet har gjennomføringa på studieførebuande utdanningsprogram i Møre og Romsdal gått opp med 0,7 prosentpoeng. På landsbasis har snittet gått ned med 0,4 prosentpoeng.

Gjennomføringa på yrkesfaglege utdanningsprogram for 2019-kullet i Møre og Romsdal er på 74,5 prosent, og best av fylka. Det nasjonale snittet er på 71,1 prosent.

Samanlikna med 2018-kullet har gjennomføringa i Møre og Romsdal auka med 0,4 prosentpoeng. På landsbasis er snittet stabilt på 71,1 prosent.

Både i Møre og Romsdal og på landsbasis er gjennomføringa høgast på idrettsfag. Møre og Romsdal kan vise til 97,5 prosent og på landsbasis er den på 93,4 prosent.

Gjennomføring fordelt på studieretning og kjønn viser at det er flest jenter som gjennomfører innan studieførebuande utdanningsprogram. Innan yrkesfaglege utdanningsprogram er det flest gutar som gjennomfører. Skilnaden mellom kjønna er størst innan studieførebuande utdanningsprogram.

5.5 Framleis i opplæring

Ein del av dei som ikkje fullfører vidaregåande opplæring innan fem/seks år, fullfører på eit seinare tidspunkt. Årsaker kan vere midlertidige avbrot i opplæringa, omval, ikkje beståtte fag, eller ikkje bestått eller ikkje gjennomført fag-/sveineprøve.

Elevar og dei som har læretid i bedrift, har rett til meir opplæring dersom dei har fullført opplæringa, men ikkje bestått standpunktkarakter, eksamen eller fag- eller sveineprøve.

I 2019-kullet i Møre og Romsdal er 2,9 prosent framleis i opplæring etter fem/seks år. Landsgjennomsnittet er på 3,0 prosent. Samanlikna med 2018-kullet er det ei auke i Møre og Romsdal på 0,1 prosentpoeng, på landsbasis er det ei auke på 0,4 prosentpoeng.