9 Arbeidet vidare

I det vidare arbeidet med å utvikle kvaliteten til den vidaregåande opplæring i Møre og Romsdal skal vi i tida framover:

• Auke gjennomføringa, med mål om at over 85 prosent av elevar og lærlingar skal gjennomføre etter fem/seks år i vidaregåande opplæring.
• Arbeide vidare med læringsmiljø, med mål om at arbeidet skal bidra til trygge skole- klasse- og arbeidsmiljø, trivsel og læring. Eit godt læringsmiljø bidrar til livsmeistring, og legg til rette for utvikling av sosiale og faglege kompetansar.
• Betre læringsutbyttet gjennom aktiv medverknad, med mål om at elevar og lærlingar skal ha moglegheit til å medverke i opplæringa si. Elevar og lærlingar skal bli høyrde og involverte i eige læringsarbeid. Skolar og lærebedrifter skal vere aktive i arbeidet med å inkludere elevane og lærlingane sine, slik at dei opplever reell medverknad.
• Betre overgangane i opplæringa, med mål om at gode overgangar skal føre til at fleire gjennomfører den vidaregåande opplæringa. Arbeidet skal betre samarbeidsstrukturane for overgangar frå ungdomsskole til vidaregåande, frå vidaregåande skole til opplæring i bedrift og i overgangar til høgare utdanning. I overgangsarbeidet skal elevar med særskilt sårbarheit, karriererettleiing og formidlingsarbeid stå i særleg fokus. Det skal bli arbeidd med å førebu og kvalifisere fleire elevar til opplæring i bedrift i samarbeid med arbeidslivet.
• Vidareutvikle leiing, skoleutvikling og profesjonsfellesskap, med mål om å fremme gode delings- og læringskulturar gjennom aktiv deltaking og dialogar. Elevane si læring og utvikling skal vere i fokus i arbeidet med skolebasert kompetanseutvikling, digital kompetanse, læreplanarbeid og vurderingspraksis.